Der Wochenspiegel veröffentlicht in loser Folge Texte auf Plattdeutsch. Unterstützt werden wir dabei vom Verein für Niederdeutsch im Land Brandenburg e.V. sowie vom Plattdeutschen Stammtisch Wittstock. Dafür vielen Dank! Und Ihnen, liebe Leserinnen und Leser, viel Vergnügen beim Lesen! Ihr Wochenspiegel-Team
Kurt Möbius führt vör sien Dör
in´n nagelniegen Auto vör.
Fuurts kümmt sien Nawer Pagel ran
un kickt sich nu dit Fohrtüg an. –“Du, Kurt”, meint hei, “grad in dees Tiet,
wur ümmer dürer ward de Sprit -
un bet in´n Häben stieg´n de Stü´rn,
kümmst du mit so´n grot Schees tau führn?
De süppt doch säker glatt för twei --­
wenn ´k tau´n Vergliek mien Auto seih!”
­“Du, Franz, dat ein, dat segg ik di:
Benzinpries´ - kümmerten mi nie! -
Hew ümmer tankt för föftig Mark ­
hüt sünd dat Euro ... räd´ kein´n Quark ...
Un dit nieg´ Auto, dat steiht wiss,
in´n Spritverbruk sihr billig is! -
Kannst´ glöben ... is de Tank ganz vull,
ik dusend Kilometer rull!”
Franz geiht nah Hus - em argert dit! -
De nägsten Daag kreg´n Nawers mit,
dat dor in Franz sien´n ollen Stall
nu schweißt ward, schläpen, kloppt as mall,
bet nah drei Daag geiht up de Dör,
un Pagel führt mit ´t Auto vör. -
Nahdem sien Fru nu tau em stiggt,
süht man de twei teihn Daag lang nich.­
Kum sünd sei trüch von ehrer Fohrt
hett dat kein fief Minuten wohrt,
bet Nawer Möbius steiht dor:
“Ji wiert verreist? - Seggt, is dat wohr?” –
Uns Franz vertellt, as näbenbi:
“Wi führten kort nah Rimini,
wiern denn in Rom un süss-noch-wur,
doch irgendeins end´t jede Tour -
denn geiht ´t nah Hus, denn geiht ´t taurüch ...
Un tankt hew ik bet hüt noch nich ...
Du mit dien´n Dus´nd-Kil´meter-Tank! --­
Ik führt vierdusend (!) - Gott sei Dank!“ -
“Vierdusend, Franz? --- Dat kann nich sin! -
Wurväl Benzin kriggst du denn rin
in´n Tank von dien lütt Diert von Wagen ...
Dörf ik de Kuffertklapp upschlagen?”­
As Franz nu nickköppt, deit hei dit. --­
Verdattert kriggt Kurt Möbius mit:
de Kuffertrum wier ganz verschwunn´ --­
Franz bugt´ em üm tau ´e Kraftstofftunn´!Helmut Hillmann