Wat leggt so warm sick aewer’t Land
nah all dei grote Küll?
Dat is, as wenn ’t in ’n Märzenmaand
all Sommer warden süll.
So sachten geiht un weiht de Wind
hen aewer Gorn und Feld,
röppt hier ’ne Blaum un dor en Blatt
ganz liesen in die Welt.
Un ierst dei Sünn, dei grote Stiern,
wat lacht dei hell von ’n Häben!
Nu söl’n in ’n Stratengraben sick
woll Ies un Snei bald gäben.
Ne ganz lütt Meis’ singt all von Leiw’,
ein Leid, so säut un klor,
un gistern seeg’n mien Jung un ick
all ’n jungen Hasen gor.
Ne, ne, Fründ Winter, nu is ’t ut
mit dienen witten Tand,
dei März mit Sünn un Sommerdag
jagt di bald ut dat Land.
Un is dei März allein tau swack,
April un Mai stahn prat,
ick rad di gaut, giff up dei Sak,
tau ’n Dickdaun is ’t tau lat!
Richard Giese