Der Wochenspiegel veröffentlicht in loser Folge Texte auf Plattdeutsch. Unterstützt werden wir dabei vom Verein für Niederdeutsch im Land Brandenburg e.V. sowie vom Plattdeutschen Stammtisch Wittstock.
Dafür vielen Dank! Und Ihnen, liebe Leserinnen und Leser, viel Vergnügen beim Lesen! Ihr Wochenspiegel-TeamEin Mus, ein Pogg, ohn Schauh un Sock,
gahn dörch dat Holt.
Dor ward’n de Mus in’t Stormgebrus
de Bein so kolt.
Furts söcht de Pogg ein deipes Lock,
möckt Füer an,
dormit de Mus, grad as tau Hus,
sick warmen kann.
Dor kümmt mit eins ganz unverseihns
ein Rägenschuer.
Wat för’n Mallür, so is dat Füer
man kort von Duer.
Wo treckt de Mus ehr Snut so krus,
seggt argerlich:
„Du olle Pog mit gräunen Rock,
ick mag di nich.“
Dor nimmt de Pogg denn Wannerstock,
is gor nich ful.
Statt säut Gesmus backt sei de Mus
driest weck an’t Mul.
Fix rönnt de Klock, de Mus un Pogg
sünd nich mihr klauk.
Sei tarrt un rakt, sei piept un quakt
mit väl Klamauk.
Ein Adebor steiht lang all dor,
nu grippt hei tau.
Mit Wähligkeit verspiest hei beid,
un denn is Rauh.
Upschreewen van Ursula Kurz, Wittenburg