Nu is dat wedder mal so wiet,
denn jedein Johr to Wiehnachtstied
beleigen wi uns mit alle Macht
ganz bannig in de hillig Nacht.
Politiker snacken von Fräden up de Erd
un schicken Schäp vull Waffen öwer ’t Meer.
De Kark dröhnt von Bescheidenheit
un bugt Paläst vull Üppigkeit.
De Hannel winkt mit söt Verlockungen
un beschitt dorbi mit halwvull Packungen.
Un de Landwirtschaft, de giwt
uns Awt un Fleisch mit sihr väl Gift.
Versäkerungs, de beiden di
binah ümsünst ein Rente
un willen doch eigentlich
blots von di Prozente,
denn vull von Achterrück
willen sei dien Geld un nich dien Glück.
Wenn ick mien Kinner segg,
ick will gor kein Geschenken
un dorför blots an arme Lüd mal denken,
denn hollen sei ein Familienkonferenz
un sluten kort un knapp, hei hett Demenz.
Wenn Wiehnacht blots dat Geld regiert,
denn is de Botschaft nicks mihr wiert.
Denn möten wi, üm den Wiert to redden,
bitieden niege Teiken setten.
Sünst kann ick mi Wiehnacht nich recht högen,
denn öwerall seih ick blots Lögen.
Wenn ick doch blots ein Mittel gägen fünd
Drüm wünsch ick mi, dat alle Minschen ihrlich sünd.
Rudolf Korf, Schönberg